Азаматтарды әскерге шақыру учаскелеріне тіркеуді — әскери есепке алу іс-шараларын жергілікті атқарушы органдар жергілікті әскери басқару органдарымен бірлесіп, жастарды әскери есепке қою, олардың санын, әскери қызметке жарамдылық дәрежесін анықтау, білім деңгейін, алған мамандығы мен дене даярлығын анықтау үшін жүргізеді,деп ҚР Қорғаныс министрлігінің баспасөз қызметі хабарлайды.
“Әскери қызмет және әскери қызметшілердің мәртебесі туралы” Қазақстан Республикасының Заңына сәйкес 17 жасқа толатын Қазақстан Республикасының ер азаматтары тіркелуге жатады.
Тіркеу өткізу кезеңінде жастармен әңгімелесу, әскери қызметке жарамдылығын растайтын медициналық тексеру және қажетті құжаттарды тексеру жүргізіледі. Егер тіркеу процесінде емделуге (медициналық бақылауға) мұқтаж әскер жасына дейінгілерді анықтаса, онда оларды емдеу-алдын алу ұйымдарына тіркейді.
Жастарға шақыру учаскесіне тіркеу туралы куәлік беріледі.
Әскери есепке алғаш рет тұрған азаматтармен қорғаныс істері жөніндегі басқармаларда (бөлімдерде) Қорғаныс министрлігінің әскери оқу орындарына түсу бойынша ақпараттық жұмыс жүргізіледі және келісімшарт бойынша әскери қызметтің перспективалары түсіндіріледі.
Азаматтарды шақыру учаскелеріне тіркеу ағымдағы жылдың қаңтар айынан наурыз айына дейін жалғасады. Ел бойынша барлығы 100 мыңға жуық адамды әскери есепке алу жоспарланып отыр.
Сурет: inform.kz
