Қазақстанның сыбайлас жемқорлыққа қарсы ведомствосының өкілдері еліміздің қорғаныс ведомствосының бірқатар лауазымды тұлғаларына қатысты қылмыстық іс қозғалғанын айтты, деп хабарлайды kursiv.kz жаңалықтар ресурсы.
Әңгіме Әскери өкілдіктер орталығының Әуе қорғанысы күштері бағытының бастығы және радиоэлектроника және байланыс әскери-инженерлік институты курсанттарының взвод командирі туралы болып отыр. Сондай-ақ, бұл іске кадрлар департаменті басшысының бұрынғы орынбасарының да қатысы бар.
Сыбайлас жемқорлыққа қарсы қызмет лауазымды тұлғалар сыбайлас жемқорлық қылмыс жасағанын, атап айтқанда пара алды деген күдікке ілінгендерін айтты.
Тергеу нұсқасына сәйкес, күдіктілер әскери қызметшілерді Қазақстанның басқа өңірлерінен Алматының әскери бөлімдеріне ауыстыру бойынша заңсыз бизнес ұйымдастырған.
Алдын ала мәліметтер бойынша, мұндай қызметі үшін әскери басшылар 800 мыңнан бір миллион теңгеге дейін ақы алған.
Қазіргі уақытта лауазымды адамдарға қатысты сотқа дейінгі тергеп-тексерудің барлық қажетті рәсімдері жүргізілуде, осыған байланысты олардың қылмыстық ісіне қатысты өзге ақпарат жарияланбайды.
Сурет: inform.kz
