Тұрақтандыру қорын қалыптастырумен жақында Шымкентте құрылған “Shymkent” әлеуметтік-кәсіпкерлік корпорациясы айналысуда.
“Shymkent” ӘКК” АҚ басқармасының төрағасы Рашид Аюповтың ақпаратына қарағанда, бүгінгі таңда Шымкент әкімдігі азық-түлік көлемін, құнын анықтайтын және тұрақтандыру қорының жұмысына байланысты өзге де мәселелерді реттейтін арнайы комиссия құрды.
“ҚР Ауыл шаруашылығы министрлігі “Shymkent “ӘКК” АҚ қалалар мен облыстарда тұрақтандыру қорын жүзеге асырумен айналысатын мамандандырылған компаниялары тізімге қосу бойынша жұмыс жүргізуде, – деп хабарлады “Къ” Рашид Аюпов. – “Shymkent “ӘКК” АҚ тұрақтандыру қоры бойынша мамандандырылған ұйым мәртебесін бергеннен кейін де біз осы жобаны іске асыруға кірісе аламыз. Сатып алуды келесі жылдың басында қалыптастыруды жоспарлап отырмыз”. Аюповтың ақпараты бойынша, қазіргі таңда Шымкент пен Түркістан облысы әкімдіктерінің арасындағы келісім аясында тауар интервенциясын өткізу мүмкіндігі қарастырылуда.
“Бұл қысқа мерзімді перспективада, Шымкентте өз тұрақтандыру қоры пайда болғанға дейін, – деп түсіндірді “Shymkent”ӘКК” АҚ басшысы. – Ұзақ мерзімді перспективада делдалдардың ең аз саны болатын форматтағы жұмыс жоспарланып отыр. Көтерме-тарату орталығы жұмыс істейтін болады, ол тауарларды нарық пен әлеуметтік дүкендерге бөлетін болады. Сондай-ақ, тұрақтандыру қорының өнімдерін сататын шағын маркеттер кооперативін құру мүмкіндігі қарастырылуда. Біз барлық өнім нарықтық бағадан төмен сатылады деп күтеміз. Интервенция тұрақты болады. Біз маусымдық баға көтерілуін қадағалап, оны тежеу мақсатында бақылап отыруға ниеттіміз”.
Сулет: Shutterstock.com
