Бүгін онлайн-режимде Шанхай Ынтымақтастық Ұйымына қатысушы елдердің қауіпсіздік кеңестері хатшыларының кезекті отырысы өтуде. Бұл туралы ТАСС хабарлайды.
Онлайн-отырысты ашқан Ресей Қауіпсіздік Кеңесінің хатшысы Николай Патрушев ШЫҰ елдеріне коронавирустық пандемияның жағымсыз салдарын еңсеру үшін ұжымдық тәсілдерді әзірлеу және биологиялық қауіпсіздік саласындағы ынтымақтастықты дамытуға ерекше назар аудару қажет деп мәлімдеді.
Патрушев эпидемия ШЫҰ мемлекеттерінің беріктігіне сынақ болғанын, статистика көрсеткендей, абыроймен өтіп жатқанын атап өтті.
Отырыста ұйым елдерінің Қауіпсіздік кеңесінің хатшылары лаңкестікке, экстремизмге, сепаратизмге және есірткі заттарының заңсыз айналымына қарсы бірлескен күрес тетіктерін жетілдіруді талқылайды.
Сондай-ақ, бейнеконференция аясында тараптар ШЫҰ кеңістігіндегі қауіпсіздік пен тұрақтылыққа қатысты мәселелерді қарастырады.
Ресми деректерге сәйкес, ШЫҰ-ға қатысушы елдер: Қазақстан, Ресей, Қырғызстан, Тәжікстан, Өзбекстан, Үндістан, Пәкістан және Қытай.
