2020 жылғы 14 қыркүйекте Швейцарияның Федералдық билігі «Қорғас ісі» бойынша ұйымдасқан қылмыстық қоғамдастық мүшелері шетелге шығарған 390 млн теңгеден астам қаражатты Қазақстанға қайтарды, бұл туралы «ҚазАқпарат» ХАА ҚР Бас прокуратурасының баспасөз қызметіне сілтеме жасап хабарлайды.
Аталған қаржы қаражаты 2012 жылдан бері халықаралық іздеуде жүрген қылмыстық қоғамдастықтың белсенді мүшелерінің бірі Мағзұм Әбдіралиевке тиесілі шетелдік компанияның шотында Швейцария банкінде болған.
Швейцариядан келген Әбдіралиевтің қылмыстық активтерін қайтару бойынша жұмыс 2018 жылдан бері жүргізіліп келеді.
Бұған дейін, 2019 жылы осы іс бойынша мемлекет кірісіне Швейцариядан 140 млн.теңге қайтарылған болатын.
Осылайша, Швейцариядан осы іс бойынша мемлекеттік бюджетке шетелден активтерді қайтару бойынша жұмыс аясында түскен қаражаттың жалпы сомасы шамамен 530 млн теңгені құрайды (1,3 млн АҚШ долларынан астам).
