Шымкент қаласының әкімі Ерлан Айтаханов қаланың әлеуметтік және экономикалық дамуы жөніндегі брифинг барысында жақын арада Шымкентте Диснейленд және бірнеше өнеркәсіптік аймақ салынатынын атап өтті.
Ол шетелдік инвесторлар қала аумағында қырықтан астам жобаны жүзеге асыруға өтінім бергенін мәлімдеді. Диснейленд инвесторы бүгінгі күні қосымша қаржылық серіктес іздеумен айналысады. Қазір Шымкентте шетелдік инвесторлар қаржыландыратын он бес жоба жүзеге асырылуда. Олардың жалпы сомасы 2,5 миллиард доллардан асады.
“Қазір шағын және орта бизнеске үлкен назар аударамыз. Екі индустриялық аймақ бар, олар толығымен толтырылған. Қазір үшінші аймақ құру туралы мәселе туындады. Оған қоса агро-индустриялық аймақ құратын боламыз. Егер өндірістегі ірі жобалар-мақтаны өңдеу туралы айтатын болсақ. Біз шикізатты сатудан терең өңдеуге кетеміз”, – деді әкім.
Сурет: 24.kz
