ҚР Премьер-Министрінің бірінші орынбасары – ҚР Қаржы министрі Әлихан Смайылов ҚХР-ға сапары барысында Шанхайдағы 2-ші Қытай халықаралық импорттық көрмесінің ашылу рәсіміне қатысты, деп «ҚазАқпарат» ХАА ҚР Қаржы министрлігінің баспасөз қызметіне сілтеме жасап хабарлайды. А. Смайылов Қазақстанның экономикалық және инвестициялық әлеуетін көрсету мақсатында ҚХР Коммерция министрлігі ұсынған Шанхай көрмесіндегі ҚР ұлттық және коммерциялық павильондарына барды.
2019 жылы 13 маусымда Бішкек қаласында ШЫҰ ҮБК 19-шы отырысына қатысу аясында өткен ҚР Президенті Қасым-Жомарт Тоқаев пен ҚХР Төрағасы Си Цзиньпин арасындағы келіссөздер барысында қытай тарапы Қазақстанға қараша айында 2-ші Қытай халықаралық импорттық тауарлар көрмесіне құрметті қонақ ретінде қатысуды ұсынды.
Қазақстан Республикасы Шанхай көрмесінде елдің экономикалық және инвестициялық әлеуетін көрсету мақсатында ұлттық стенд орнатты. ҚР Ұлттық павильоны сегіз ірі компаниядан тұрады, оның ішінде «Kazakh Invest «ҰК» АҚ, «Самұрық-Қазына» ҰӘҚ, «Бәйтерек» ҰБХ, АХҚО, «Астана ЭКСПО-2017» ҰК, «KazakhExport», «Qazaqtrade», «Kazakh Tourism» және «Қорғас» ШЫХО.
Сондай-ақ, 180 ш.м. алаңда Шанхай импорттық көрмесінде Қазақстан өнімдерін ҚР азық-түлік және ауыл шаруашылығы саласының 30 компаниясы ұсынды. Көрме аясында бірқатар экспорттық келісім-шарттарға қол қойылды. Өткен жылы Шанхайдағы 1-ші Қытай халықаралық импорттық көрмеге әлемнің 130-дан астам елінен 3 мыңнан астам компания қатысты. Олардың 200-і әлемнің 500 ірі кәсіпорындарының тізіміне кіреді.
Ауқымды іс-шараға 18 мемлекет және үкімет басшылары мен 160 мыңға жуық сатып алушы қатысты.
