Сандық даму, Қорғаныс және аэроғарыш өнеркәсібі министрі Асқар Жұмағалиев Қазақстанда 5G желісін енгізу жұмыстарының барысы туралы айтып берді, деп «ҚазАқпарат»ХАА тілшісі хабарлайды.
«Қазақстанда жаңа технологияларды енгізу бойынша жұмыстар жүргізіліп жатқанын атап өткім келеді. Президенттің тапсырмасына сәйкес Министрлік Қазақстанда 5G желісін енгізу бойынша жұмыс жүргізуде. Осыған байланысты жол картасы бекітілді. Қазіргі уақытта 5 G ұялы байланыстың жаңа технологиясының стандартын анықтау жұмыстары жүргізілуде», — деді Асқар Жұмағалиев Мәжілістегі Үкімет сағатында.
Министр 5G ұялы байланыстың тестілік сынақтары Нұр-сұлтан, Алматы және Шымкент қалаларында жүргізілгенін хабарлады.
«Сынақ қорытындысы бойынша интернет-заттарды, телемедицинаны, өнеркәсіпті цифрландыруды, «ақылды» қалаларды дамытуда технологияны қолдану мүмкіндіктеріне талдау жасалады», — деп түсіндірді Асқар Жұмағалиев.
Ол сондай-ақ, 5G технологиясын енгізу үшін тартылатын инвестициялардың үлкен көлеміне байланысты бірінші кезеңде осы технологияны енгізу Республикалық маңызы бар қалаларда (Нұр-сұлтан, Алматы, Шымкент) жоспарланғанын айтты.
Осылайша, 2021 жылдың соңына дейін Нұр-сұлтан қаласында Назарбаев Университетінде және ЭКСПО-да, сондай-ақ 2022 жылы әуежайда және вокзалда, сауда орталықтарында 5G технологиясын енгізу жоспарлануда. Одан әрі 2023 жылдан бастап еліміздің барлық облыс орталықтарында енгізу бойынша жұмыстар жүргізілетін болады.
«Нұр-сұлтан қаласындағы Astana Hub аумағында коммерциялық негізде 5G желісін енгізу жұмыстары аяқталуда. Ол жерде 2020 жылдың соңына дейін енгізілетін болады», — деп нақтылады Асқар Жұмағалиев.
Осылайша, министрдің айтуынша, жоғарыда көрсетілген жобаларды жүзеге асыру бойынша жұмыстардың нәтижесінде Қазақстан халқының 97% 2022 жылдың соңына дейін Интернетке кең жолақты қолжетімділікке ие болады. Қалған 3 % үшін спутниктік технологияны қолданудың техникалық мүмкіндігі қамтамасыз етілетін болады.
