Шығыс Қазақстан облысында полиция қызметкерлері Күршім ауданының жерлерін қытайлықтарға беру туралы сыбыс таратқаны үшін бірнеше адамды ұстады. Ұсталғандарға қатысты сотқа дейінгі тергеу басталды. Бұл туралы ШҚО полиция департаментінің баспасөз қызметі хабарлады.
Сондай-ақ, «Қытай кәсіпорындарына берілген жерлер туралы» қауесетті тексеру үшін шығыс өңіріне келген елордалық белсенділер жалған ақпарат таратуда деп күдіктенеді. Бүгінгі таңда олар қамауға алынды.
Өскеменде тұратын азаматтық белсенді Руслан Нұрқановтың айтуынша,полиция қызметкерлері акцияға қатысқандарды Нұр-Сұлтанға кетіп бара жатқанда жолда тоқтатып, Өскемен полициясына жеткізген.
Бұған дейін әлеуметтік желілерде Үржар, Күршім және Жарма аудандарында Қытай кәсіпкерлеріне жер сатылып жатқаны туралы ақпарат пайда болды.
Өз кезегінде Шығыс Қазақстан облысының әкімі Даниал Ахметов «Үржар, Күршім және Жарма аудандарында бірде-бір метр жер қытай азаматтарының меншігінде жоқ» деп мәлімдеді.
Бұл туралы Қазақстан президенті Қасым-Жомарт Тоқаев та айтты. Мемлекет басшысының айтуынша, бұл қауесеттер халықтың бірлігін бұзып,еліміздегі жағдайды тұрақсыздандыруды мақсат ететін геосаяси ойындардың бір бөлігі болып табылады. Тоқаев жер ешкімге берілмейтінін мәлімдеді.
