Келесі аптада, 26 мамырда бейнеконференцбайланыс арқылы ұжымдық қауіпсіздік Шарты Ұйымы Сыртқы істер министрлері кеңесінің отырысы өтеді, деп хабарлайды ҰҚШҰ баспасөз қызметі.
Қазіргі уақытта Ресей Федерациясы ҰҚШҰ-ға төрағалық ететіндіктен, отырыс Ресей сыртқы саяси ведомствосының басшысы Сергей Лавровтың төрағалық етуімен өтеді.
Алдағы бейнеконференцияның күн тәртібі халықаралық және өңірлік қауіпсіздікті дамытуға, сондай-ақ ҰҚШҰ-ның Тәуелсіз Мемлекеттер Достастығымен және Шанхай Ынтымақтастық Ұйымымен ынтымақтастығына қатысты мәселелерден тұрады.
Сондай-ақ ҰҚШҰ мемлекеттерінің сыртқы саяси ведомстволары басшылары ұйымға мүше елдердің халықаралық алаңдарда өзара іс-қимыл мәселелерін қарастыратын болады.
Отырыс аясында Ұлы Отан соғысы Жеңісінің 75 жылдығына орай бірқатар бірлескен мәлімдеме қабылдау жоспарланып отыр.
ҰҚШҰ баспасөз қызметінде алдағы бейнеконференция ұйымға қатысушы елдер арасындағы одақтастық өзара іс-қимылды дамытудың кезекті кезеңі ретінде қарастырылатынын атап өтті.
Бүгінгі таңда Ұжымдық қауіпсіздік Шарты Ұйымының мүшелері: Қазақстан, Ресей, Беларусь, Армения, Қырғызстан және Тәжікстан.
Сурет: eadaily.com
