Қазақстан Республикасының Қорғаныс министрі генерал-лейтенант Нұрлан Ермекбаев 27 сәуірде Душанбеде өткен Қорғаныс министрлері кеңесінің отырысына қатысты, деп “ҚазАқпарат” ХАА ҚР Қорғаныс министрлігінің баспасөз қызметіне сілтеме жасап хабарлайды.
Күн тәртібіне Ұжымдық қауіпсіздік туралы шарт ұйымына мүше мемлекеттердің әскери қауіпсіздігі мәселелері шығарылды. Отырыс барысында жедел ден қою ұжымдық күштерін қазіргі заманғы қару-жарақпен, әскери техникамен және арнайы құралдармен жарақтандыру жөніндегі жоспарлар қаралды. Қатысушылар Ұжымдық қауіпсіздік жүйесінің күштері мен құралдарының 2022 жылға арналған бірлескен дайындығын және сыртқы саясат, қорғаныс және қауіпсіздік мәселелері бойынша 2021 жылдың екінші жарты жылдығы – 2022 жылдың бірінші жарты жылдығына арналған консультациялар жоспарын талқылады.
Отырыста Ұжымдық жедел ден қою күштері қолбасшылығының үлгілік құрылымы мен штаты туралы ҰҚШҰ Қорғаныс министрлері кеңесі мен Қауіпсіздік кеңестері хатшылары комитетінің шешімінің жобасы ұсынылды. Қазақстан Республикасының Қорғаныс министрі генерал-лейтенант Нұрлан Ермекбаев әлемдегі және өңірдегі ахуал тұрақты бола қоймайтынын, дәстүрлі жағдайлар сақталып, қауіпсіздікке жаңа сын-қатерлер туындап жатқанын атап өтті. Мұндай жағдайларда мемлекеттер мен халықаралық құрылымдардың қызметін тығыз үйлестіру, олардың мүмкіндіктері мен күш-жігерін біріктіру тұрақтылық пен қауіпсіздікті қамтамасыз етуге мүмкіндік береді. ҰҚШҰ дағдарыстық әрекет ету орталығының мүмкіндіктерін кеңінен пайдалану ұсынылды, ол өз тиімділігін көрсетті.
