Сеулде Корей түбегінің денуклеаризация бойынша екінші қазақстандық-корей форумы өтті. Бұл іс-шараны Қазақстан Республикасының Тұңғыш Президенті Нұрсұлтан Назарбаевтың қоры ұйымдастырды.
Іс-шараға Корея Республикасының мемлекеттік қайраткерлері, Оңтүстік Кореяның сыртқы саясат ведомствосының және дипломатиялық корпусының өкілдері, сондай-ақ Сеул ұлттық университетінің профессорлары мен академиктері қатысты.
Қазақстан тарапынан форум жұмысына Елбасы қорының басшылығы, Қауіпсіздік кеңесінің, Сыртқы істер министрлігінің, Қазақстандық стратегиялық зерттеулер институтының, Ұлттық ядролық орталықтың, сондай-ақ Қазақстанның Тұңғыш Президенті Қоры жанындағы әлемдік экономика және саясат институтының өкілдері қатысты.
Елбасы Қоры атқарушы директорының орынбасары Игорь Рогов форумда сөйлеген сөзінде біздің еліміз бен Оңтүстік Кореяны тек саяси және экономикалық байланыстарды ғана емес, ядролық қауіпсіздік саласындағы жалпы мәселелерді де байланыстыратынын айтты.
“Біздің еліміз өз тәжірибесінде ядролық мұраның барлық ауыртпалығын білді. Бүгін Тұңғыш Президент Қоры ядролық қарусыздану саласындағы қазақстандық тәжірибеге мүдделі корей сарапшыларының қазақстандық әріптестерімен сөйлесуге мүмкіндік алуы үшін осы алаңды құрды”, – деді Игорь Рогов.
Korea Foundation Президенті Ли Гун Рогов сөзін тыңдап, Қазақстанның Тұңғыш Президенті Нұрсұлтан Назарбаевтың ядролық қарусыз әлем құрудағы елеулі үлесін атап өтті.
“Екі қордың жұмысы түрлі деңгейдегі ядролық қарусыздану мәселелері талқыланатын сапалы алаңдарды құру болып табылады. Бірінші Президент Нұрсұлтан Назарбаев бастаған Қазақстан ядролық қауіпсіздік ісіне баға жетпес үлес қосты. Қазақстандық тәжірибе біз үшін өте маңызды. Бұл жұмыстың форматы жалғасады және форум жұмысына басқа елдер қосылады деп ойлаймын”, – деді Ли Гун.
Іс-шара аясында тараптар мұндай форумдар басқа елдер мен ұйымдар үшін бейбітшілікті қамтамасыз етуге бағытталған прогрессивті идеялар туралы жолдау болып табылады деген ортақ пікірге келді.
Сурет: Zakon.kz
