Бүгін Сенатта “Қазақстан Республикасының кейбір заңнамалық актілеріне туристік қызмет мәселелері бойынша өзгерістер мен толықтырулар енгізу туралы” заң жобасы талқыланды, деп хабарлайды “ҚазАқпарат” ХАА, ҚР Парламенті жоғарғы палатасының баспасөз қызметіне сілтеме жасай отыра.
Әлеуметтік-мәдени даму және ғылым комитетінің кеңейтілген отырысында заң жобасы реттеуші құралдарды оңтайландыру арқылы ішкі және сыртқы туризмді дамытуды ынталандыруға бағытталғандығы атап өтілді. Елдің заңнамасына сәйкес туристік нысандар мемлекет қолдайтын жеке кәсіпорындар тізіміне енгізіледі, сондай-ақ жаңа нысандар салу кезінде инвестициялық преференциялық нормалармен толықтырылады. “Басым туристік аймақтарды құру ресурстарды неғұрлым перспективалы даму нүктелеріне шоғырландыруға көмектеседі және мультипликативтік әсер есебінен туристік нарықтағы аумақтардың бәсекеге қабілеттілігін арттырады, сондай-ақ туристік кластерге кіретін туристік ұйымдардың тиімділігін арттырады”, – деді сенатор Динар Нөкетаева. Талқылау қорытындысы бойынша құжатты палатаның қарауына жіберу туралы шешім қабылданды.
