Қазақстан Республикасы Парламентінің жоғарғы палатасында Еуразиялық экономикалық одаққа мүше бес ел мен Сербия арасындағы еркін сауда аймағы туралы шарт мақұлданды. Бұл туралы kapital.kz жаңалықтар ресурсы хабарлайды.
“Қазақстан, Беларусь және Ресейде бұған дейін Сербия Республикасымен еркін сауда туралы екіжақты келісімдер жасалған болатын. Бірақ Армения мен Қырғыз Республикасы мұндай келісімдер жасамады. Осы Келісіммен ЕАЭО – ның барлық 5 елі үшін Сербиямен бірыңғай сауда режимі белгіленеді”, – деп Еліміздің сауда және интеграция министрлігінің басшысы Бақыт Сұлтанов осы құжатты ұсыну кезінде атап өтті.
Министрдің айтуынша, келісім Қазақстан, Беларусь және Ресей Федерациясы арасындағы бажсыз сауда үшін тауарлар тізімін кеңейтуге де ықпал ететін болады.
“ЕАЭО-ға қатысушы елдер кедендік баж салығын төлемей Сербияға ірімшік, алкогольді ішімдіктер мен темекі жеткізе алады. Бұрын бұл тауарларға импорттық кеден баждары салынатын. ЕАЭО ішкі нарығын қорғау үшін құс етін, қантты, маталарды, алкогольді ішімдіктерді, темекіні әкелуге, сондай – ақ компрессорлар мен моторлы көлік құралдары сияқты кейбір өнеркәсіптік тауарларға баж салығын қолдануды сақтап қалды”, – деп Сұлтанов нақтылады.
Министр сондай-ақ, бұл құжатты іске асыру ЕАЭО-ға қатысушы елдерде шығарылатын өнімді өткізу нарығын кеңейтуге мүмкіндік беретінін қосты.
“Атап айтқанда, қазақстандық өнімнің Сербияға экспортын арттыру әлеуеті 250 миллион долларды құрайды. Бұл мұнай – химия, химия, металлургия, көлік жасау, тамақ өнеркәсібі салаларының тауарлары, сондай-ақ құрылыс материалдары”, – деп Сұлтанов хабарлады.
Сурет: kapital.kz
