Қазақстан Парламенті жоғарғы палатасының депутаттары «Астана» халықаралық қаржы орталығына барды. Бұл туралы Сенаттың баспасөз қызметі хабарлады.
АХҚО басқарушысы Қайрат Келімбетов сенаторларды қарсы алып, оларды орталықтың жұмысымен таныстырды. Сондай-ақ, Парламенттің жоғарғы палатасының депутаттары, әлемдік қаржы нарығының барлық өзекті үрдістерін ескеретін,АХҚО даму стратегиясын әзірлеу туралы хабардар болды.
Басқарушының ақпараты бойынша, «Астана» халықаралық қаржы орталығы «100 қадам» Ұлт жоспарын жүзеге асыру аясында ашылды. Оның бес компоненті АХҚО-ға арналған.Бүгінгі күні барлық бес тапсырма орындалды немесе белсенді орындау сатысында.
АХҚО басқарушысы бұл орталықтың негізгі міндеті біздің Республикамыздың экономикасын нығайтуды белсенді қолдау болып табылатынын атап өтті. Осыған орай, орталыққа капиталдың жергілікті нарықта және әлемдік нарықпен бірлесе дамуына байланысты үлкен міндеттерді іске асыру тапсырылды.
Сонымен қатар, Қайрат Келімбетов Қазақстанның инвестициялық тартымдылығын арттыру қаржы орталығына тапсырылған міндеттердің тізіміне енетінін айтты.
Сурет: senate.parlam. kz
