Сенаттың жалпы отырысында депутат Нұрлан Қылышбаев мемлекет есебінен медициналық мекемелерге жеткізілген өкпені жасанды желдету аппараттарының жартысына жуығы толық жабдықталмағанын мәлімдеді. Осыған байланысты, сенатордың айтуынша, медициналық жабдықтар мақсатына сай пайдаланылмаған.
Парламент мүшесі биылғы жылы Үкімет резервінің қаражаты есебінен елімізде жасалған бір жарым мың өкпені жасанды желдету аппараты сатып алынғанын атап өтті. Алайда, олардың тек 831-і толық жинақталған.
“Мысалы, Жамбыл облысы бойынша пайдалануға жоспарланған 53 аппараттың бірде-біреуін пайдалануға болмайды, Түркістан облысы бойынша да осындай жағдай – 58 аппараттың барлығы толық жабдықталмаған”, – деді депутат.
Қылышбаевтың пікірінше, мұның бәрі бюджет қаражатын тиімсіз жоспарлаудың нәтижесі болып табылады. Сонымен бірге, ол коронавирустық пандемия жағдайында мұндай фактілерге жол берілмеуі керектігін атап өтті.
Осыған байланысты сенатор тиісті мемлекеттік органдардың бюджет ақшасын уақтылы және, ең бастысы, сапалы пайдалануды қамтамасыз етуге мүмкіндік беретін шаралар қабылдау қажеттігі туралы мәлімдеді.
Сурет: itc.ua
