Қазақстан Парламенті жоғарғы палатасының төрағасы Дариға Назарбаева қазіргі таңда карантиндік режимді енгізуге байланысты жұмыстан айырылған азаматтарға назар аудару маңызды деп мәлімдегенін, Сенаттың баспасөз қызметі хабарлады.
Бұл мәлімдемені Сенат төрағасы Парламенттің жоғарғы палатасы Бюросының отырысында жасады. Назарбаеваның айтуынша, өңірлерден сайланған сенаторлар облыс басшылығын жұмыспен қамтудың жол картасы қаржысын қандай мақсаттарға жұмсайтынын зерделеуі тиіс.
“Біз әлеуметтік жұмыспен қамту бағдарламаларын жүзеге асыру кезінде қандай заң бұзушылықтарға жол берілгенін жақсы білеміз. Қалалардың карантинге жабылуына байланысты жұмыссыз қалған адамдарға назар аудару қажет. Олар ерекше қолдауды қажет етеді”, – деді Дариға Назарбаева.
Сонымен қатар, кездесу аясында Сенат Бюросының мүшелері Парламенттің жоғарғы палатасының алдағы отырысының күн тәртібін қарады және Мәжіліс депутаттары мақұлдаған заң жобаларын комитеттер арасында бөлу мәселелері талқыланды.
Отырыс соңында Дариға Назарбаева Сенат комитеттеріне, елімізде бір триллион теңге бөлінетін, жұмыспен қамтудың жол картасын жүзеге асыруға ерекше көңіл бөлуді тапсырды.
Сурет: inform.kz
