Бішкекте Қазақстан президенті Қасым-Жомарт Тоқаев ҚХР Төрағасы Си Цзиньпинмен кездесті, деп Ақорда хабарлайды.
Қасым-Жомарт Тоқаев Қытай Халық Республикасының төрағасына оның сайлануына және Қазақстан Республикасы Президенті қызметіне кірісуіне байланысты жылы құттықтаулары үшін алғысын білдірді.
“Мен сізден өте жылы жазбаша құттықтау алдым. Сайлау қорытындыларын мен Қазақстан халқы тарапынан маған деген жоғары сенім және біздің Тұңғыш Президентіміз, Сіздің жеке досыңыз Нұрсұлтан Назарбаевтың бағытын қолдау ретінде қабылдаймын”, – деді Мемлекет басшысы.
Қазақстан Президенті қазақстан-қытай ынтымақтастығын дамытудың маңыздылығын атап өтті және ҚХР-мен қарым-қатынас біздің сыртқы саясатымыздың басым бағыттарының бірі болып табылатынын атап өтті.
“Бұл ынтымақтастық стратегиялық сипатқа ие, ол Еуразиялық континенттің ауқымды аумағында тыныштық пен қауіпсіздікті қамтамасыз ету үшін өте маңызды”, – деді Қасым-Жомарт Тоқаев.
Сонымен қатар, Мемлекет басшысы Қытай көшбасшысын “Бір белдеу, бір жол” Халықаралық ынтымақтастық екінші форумының табысты өтуімен және алдағы ҚХР-ның 70 жылдық мерейтойымен құттықтады.
Өз кезегінде Си Цзиньпин Қазақстан Президентін сайлаудағы жеңісімен қайта құттықтады және биылғы жылы Қытайға ресми сапармен келуге шақырды.
“Біз қазақстандық ауыл шаруашылығы өнімдерін қайта өңдеу, цифрландыру, IT-индустрия және “жасыл” технологиялар саласындағы ынтымақтастықты тереңдетуге үміттенеміз. Сондай-ақ, біз “бір белдеу, бір жол” бағдарламасы мен индустриялық – инновациялық даму мемлекеттік бағдарламасы арқылы Қазақстанның транзиттік әлеуетін кеңінен пайдалануға үміттенеміз”, – деді ҚХР Төрағасы.
Кездесу барысында тараптар екі елдің мәдени-гуманитарлық саладағы өзара іс-қимылын, атап айтқанда, жастар алмасуын кеңейту және бірлескен іс-шаралар өткізуді талқылады.
Сурет: nur.kz
