Қазақстан Парламенті жоғарғы палатасының төрағасы Дариға Назарбаева Сингапурдың Ұлттық қауіпсіздік үйлестіруші-министрі Тео Чи Хинмен қоса атқарушы болып табылатын аға министрмен кездесті,деп хабарлайды Сенаттың баспасөз қызметі.
Кездесу барысында Дариға Назарбаева Қазақстан мен Сингапурдың достық қарым-қатынастарын атап өтті, сондай-ақ сауда-экономикалық және мәдени-гуманитарлық байланыстарды нығайтуға, сингапурлық инвестицияларды біздің елімізге тартуға мүдделілік білдірді.
Сенат басшысы “Астана” халықаралық қаржы орталығының арқасында шетелдік бизнеске ашылған мүмкіндіктер туралы айтты.
“Сингапурлық компаниялар Орталық Азия және ЕАЭО елдерімен ынтымақтастықты кеңейту үшін АХҚО әлеуетін пайдалана алады. Бұл 160 миллионнан астам халқы бар жылдам дамып келе жатқан және перспективалы аймақ”, – деді Назарбаева.
Өз кезегінде, Сингапурдың аға министрі Қазақстанның Тұңғыш Президенті Нұрсұлтан Назарбаевтың екі мемлекет арасындағы екіжақты қарым-қатынасты дамытудағы үлесін жоғары бағалады.
Еуразиялық экономикалық одақ пен Сингапур арасындағы еркін сауда туралы келісімді ратификациялау туралы айта келе, Тео Чи Хин өз елі арқылы қазақстандық компаниялар өз өнімдерін Оңтүстік-Шығыс Азия елдерінің нарығына жеткізе алатынын атап өтті.
Сондай-ақ, Сингапурдың аға министрі елді цифрландыру және мемлекеттік басқару саласындағы тәжірибесімен қазақстандық тараппен бөлісуге дайын екенін мәлімдеді.
Қорытынды жасай отырып, тараптар екі мемлекет арасындағы парламентаралық өзара іс-қимылды нығайтуға келісті. Сенат төрағасы сингапурлық депутаттарды біздің елімізге келуге шақырды, сондай-ақ Қазақстан мен Сингапур арасында тікелей авиациялық қатынас орнатуды ұсынды.
