Бүгін Сенатта сот жүйесі туралы заңнаманы одан әрі жетілдіру мәселелері талқыланды. Конституциялық заңнама, сот жүйесі және құқық қорғау органдары комитетінің отырысына Жоғарғы соттың басшылығы мен судьялары да қатысты. Бұл туралы “ҚазАқпарат” ХАА ҚР Парламенті Сенатының баспасөз қызметіне сілтеме жасап хабарлайды.
Осы салада жүргізіліп жатқан реформалардың негізгі басымдықтарын бұған дейін ел президенті Қасым-Жомарт Тоқаев белгілеген болатын. Олар депутаттардың заң шығару бастамаларының негізін қалады. “Сот жүйесін реформалауды тиімді жүргізу мақсатында Парламент сот құрылысын жаңғыртуға, сот төрелігінің ашықтығы мен айқындығын, сот істерін қараудың тиімділігі мен сапасын арттыруға бағытталған бірқатар заңдар қабылдады. Бүгінгі іс – шара сот жүйесін реформалауды заңнамалық қамтамасыз ету және Мемлекет басшысының Жолдауынан туындайтын міндеттерді шешу бойынша Сенат жүргізіп жатқан жұмыстың қисынды жалғасы болып табылады”, – деп комитет төрағасы Владимир Волков атап өтті. Отырыста жүргізіліп жатқан жұмыстар туралы Жоғарғы Сот Төрағасы Жақып Асанов өз пікірімен бөлісті. Ол қазір еліміздің сот жүйесінде халықтың сенімін арттыруға және азаматтардың сот төрелігіне, сондай-ақ құқық үстемдігіне қол жеткізуін қамтамасыз етуге бағытталған басым жобаларды іске асыру жалғасып жатқанын атап өтті. Сенаторлар тарапынан жүргізіліп жатқан реформаларды уақтылы заңнамалық қолдаудың маңызы зор.
“Соңғы жылдары сот ісін жүргізу мен сот жүйесін жаңғыртуға бағытталған бірқатар жүйелі шаралар қабылданды.Депутаттардың қолдауының арқасында ағымдағы жылдың 11 наурызында сот жүйесін жаңғырту бойынша түзетулер қабылданды. Жұмыс жалғасуда”, – деді Жақып Асанов. Кездесуді қорытындылай келе, Комитет төрағасы Владимир Волков комитет сот билігінің тәуелсіздігін нығайту үшін Президенттің тапсырмаларын орындау бойынша алдағы уақытта да күш-жігер жұмсайтынына назар аударды.
