Қазақстан астанасында «Орталық Азияда өркендеу жолындағы интеграцияны күшейту» тақырыбында аймақтық конференция өтуде, оған Қазақстан Парламенті жоғарғы палатасының депутаты Сәуле Айтпаева қатысуда, деп хабарлайды Сенаттың баспасөз қызметі.
Еуроодақ ұйымдастырған бұл конференцияның басты мақсаты — осы жылдың 17 маусымында қабылданған Еуропалық Одақтың Орталық Азия бойынша жаңа стратегиясы шеңберінде Қазақстан, Қырғызстан, Тәжікстан, Түркіменстан және Өзбекстан арасындағы өңірлік ынтымақтастықты нығайту.
Бұл іс-шараны ұйымдастырушылар, қатысушыларды Еуроодақ қаржыландырып жатқан, Орталық Азия аймағындағы сауда, инвестиция, сондай-ақ экономикалық өсімді қолдауға бағытталған үш бағдарламаны іске асырудың басталғандығы туралы хабардар етті.
Сонымен қатар, конференция барысында Еуропалық одақтың Орта Азия бойынша жаңа стратегиясына байланысты мәселелер белсенді талқыланды.
Осы пікірталас аясында Орталық Азия аймағы елдерінің дамуының басым бағыттарына қатысты мәселелерге назар аударылып, өңірлік және халықаралық сауда интеграциясын күшейту жоспарлары айтылды.
Аталған конференция ұйымдастырушыларының ақпаратына сәйкес, бұл шараның екінші күні Еуроодақтың «Орталық Азия Инвест» аймақтық бағдарламасына арналады.
