Семей гарнизоны әскери сотының өкілдері Семей қаласында әскери бөлімнің қаржы қызметінің бұрынғы бастығы сотталғанын хабарлады.
“Сот үкімімен “К” ҚР ҚК 189 – бабы 3-бөлігінің 1 және 2-тармақтарында көзделген қылмыс жасағаны үшін кінәлі деп танылып, оған бір жыл және үш ай мерзімге бас бостандығынан айыру жазасы тағайындалды”, – деп хабарлады ведомстводан.
Сот ақпараты бойынша, сотталған “аға лейтенант” әскери атағынан айырылды. Сонымен қатар, ол мемлекеттік қызмет атқару және құқық қорғау органдарында еңбек қызметін атқару құқығынан айырылды.
“Сотта ” К ” әскери бөлімнің қаржы қызметінің бастығы болып отырып, сеніп тапсырылған бөтен мүлікті иемденіп, ысырап еткен, өзінің қызмет бабын пайдалана отырып, пайдакүнемдік мүддеден, әскери бөлімнің қызметкерлеріне жалақыны есептеу және аудару бойынша жеке өзінің қолындағы қаржылық-бухгалтерлік құжаттамадан ақшаны жеке мақсатта ұрлап, тотализаторды ұтып алуды тілеп, ақшаны өзінің жеке шоттарына да, сондай-ақ әскери қызметшілердің шоттарына да аударған,оларды алдын ала ескертіп, ақшаның қате аударылғанын айтып, бөлім кассасына қайтаруды сұраған. Ақша қайтарылған соң,кассаға салмай, букмекерлік кеңседе ставкаларға жұмсап жіберген”, – деп нақтылады сотта.
Сондай-ақ, әскери сот қызметкерлері сотталғанның келтірген материалдық шығын сомасы жеті миллионнан астам теңгені құрағанын хабарлады. Үкім заңды күшіне енді.
Сурет: Yaizakon.com.ua
