Семейде ұлттық гвардияның жас сарбаздарды жауынгерлік іске даярлаумен айналысатын 5511 әскери бөлімінің қызметшілері үш күндік практикалық сабақтан өтті. Бұл туралы ҚР Қорғаныс министрлігінің баспасөз қызметі хабарлады.
Ведомствоның ақпараты бойынша, офицерлер үш күндік сабақ кезінде дене шынықтыру дайындығы, мемлекеттік тілді білу және лауазымдық міндеттер бойынша сынақ тапсырды.
Сонымен қатар, Тәрбие әлеуметтік-құқықтық жұмыстары органдарының офицерлері үшін далалық оқу орталығында сабақтар өткізілді.
Қазақстан Республикасы ұлттық ұланы “Шығыс” өңірлік қолбасшысының орынбасары Берік Тоқтаров әскери қызметшілердің практикалық сабақтардан сәтті өткенін хабарлады.
“Тәрбие әлеуметтік-құқықтық жұмыс органдарының офицерлері дағдарыс жағдайында моральдық-психологиялық шараларын өткізуге дайын. Бүгінгі практикалық сабақтарда дәлелденді. Жоғары нәтижелер көрсетті”, – деді Тоқтаров.
