SCAT авиакомпаниясы Қазақстан Республикасының азаматтарын отанына қайтару үшін Сауд Арабиясына екі рейс жасайды. Бұл туралы әуетасымалдаушының баспасөз қызметі хабарлайды.
Бірінші әуе рейс 29 ақпанда, екінші рейс — 4 наурызда орындалады. Жалпы алғанда әуетасымалдаушы Қазақстанға еліміздің 400-ге жуық азаматын жеткізеді.
SCAT компаниясының өкілдері қазақстандықтар елге жеткізілгеннен кейін әуе компаниясы Сауд Арабиясына рейстерді тоқтататынын хабарлады.
Бұған дейін хабарланғандай, Сауд Арабиясы билігі қазақстандықтарға туристік виза беруді тоқтатты.
Кейін Сауд Арабиясының елшілігі біздің еліміздің азаматтарына виза берілуін тоқтатуға байланысты түсініктеме берді. Олар мұндай шара Сауд Арабиясында коронавирустық инфекцияның таралуын болдырмау үшін қабылданғанын айтты.
Қазақстан денсаулық сақтау министрлігі ақпаратына сәйкес, біздің республикада коронавирус инфекциясын жұқтырғандар тіркелген жоқ. Сонымен қатар, бұған жол бермеу үшін барлық шаралар қабылдануда.
