Халық алдындағы есеп беру кездесуі кезінде еліміздің сауда министрі Бақыт Сұлтанов Еуразиялық экономикалық интеграцияның 2025 жылға дейінгі даму стратегиясына қатысты пікір білдірді. Бұл туралы оның баспасөз қызметі жазады.
Сұлтановтың айтуынша, қазір өзі басқарып отырған ведомствоның басты міндеттерінің бірі осы стратегия жобасымен жұмыс болып табылады.
«Жобада базалық бағыттарды дамытумен қатар, ЕАЭО үшін денсаулық сақтау, білім беру, ғылым, туризм, спорт және қоршаған ортаны қорғау сияқты жаңа бағыттар бойынша экономикалық ынтымақтастық негізі қаланады», — деді министр.
Сауда министрлігінің басшысы Еуразиялық интеграцияны дамытудың стратегиялық бағыттарының жобасы Қазақстан Республикасының ұлттық мүдделеріне жауап беретінін атап өтті.
Сондай-ақ, есеп беру кездесуі аясында Бақыт Сұлтанов сауда министрлігі 2021-2025 жылдарға арналған мемлекетте сауданы дамытудың мемлекеттік бағдарламасының жобасын әзірлегенін айтты.
Министр бұл мемлекеттік бағдарлама жобасында заңнамалық жетілдіру шаралары ғана емес, сонымен қатар сауда инфрақұрылымын дамытуға және бизнесті қолдауға бағытталған құралдар да бар екенін мәлімдеді.
Сурет: mir24.tv
