Қазақстан Республикасының Сауд Арабиясындағы Төтенше және Өкілетті Елшісі Берік Арын Аш-Шаркия провинциясының сауда-өнеркәсіп палатасының басшысы Абдулхаким Хамад Альхальдимен кездесіп, ынтымақтастықты дамытуға қатысты мәселелерді талқылады. Бұл туралы Қазақстан дипломатиялық ведомствосының баспасөз қызметі хабарлады.
Атап айтқанда, кездесу барысында біздің держава мен Сауд Арабиясы арасындағы инвестициялар мен сауда саласындағы өзара қатынасты кеңейтуге қатысты мәселелерге назар аударды.
Сондай-ақ кездесу аясында қазақстандық дипломат сұхбаттасын Қазақстанда инвестиция тартуға бағытталған жүргізіліп жатқан жұмыстармен таныстырды. Аш-Шаркия провинциясының сауда-өнеркәсіп палатасының төрағасы елімізде шетелдік кәсіпкерлер үшін барлық жағдай жасалғаны туралы хабардар болды.
Екі мемлекет арасындағы тауар айналымы туралы айта келе, Қазақстан елшісі оның төмен қарқынына назар аударды және осыған байланысты біздің ел мен Сауд Арабиясы арасында іскерлік байланыстар орнатуға шақырды.
Өз кезегінде Аш-Шаркия провинциясының Сауда-өнеркәсіп палатасының басшысы екі мемлекеттің бизнес-топтары арасындағы ынтымақтастықты дамытуға мүдделі екенін мәлімдеді және Сауд бизнесмендеріне қазақстандық жобаларды зерттеу мақсатында біздің елге келуіне көмек көрсететінін атап өтті.
Кездесу соңында қатысушылар алдағы уақытта да осындай кездесулер мен тақырыптық іс-шаралар өткізу қажет деген ортақ пікірге келді.
