Қазақстанның Сауд Арабиясындағы төтенше және өкілетті елшісі Берік Арын Fly Nas Сауд авиакомпаниясының атқарушы директоры Бандер Абдулрахман әл-Моханнамен келіссөз жүргізді. Бұл туралы ҚР Сыртқы істер министрлігінің баспасөз қызметі хабарлады.
Қазақстандық сыртқы саясат ведомствосының ақпараты бойынша, кездесу барысында Қазақстан мен Сауд Арабиясы арасындағы тікелей әуе қатынасын ашуға қатысты мәселелер қарастырылды.
Эр-Рияд Корольдігінің астанасынан Нұр-Сұлтан мен Алматыға тікелей әуе қатынасын ашу маңыздылығын айта отырып, қазақстандық дипломат сұхбаттасушының назарын біздің республикамызда Сауд Арабиясының азаматтары үшін визасыз режим орнатылғанына аударды.
Сонымен қатар, Қазақстан елшісі біздің ел азаматтары Сауд Арабиясына бару үшін онлайн-режимде немесе келгеннен кейін виза алуға құқылы мемлекеттер тізіміне кіретінін атап өтті.
Өз кезегінде Сауд әуе компаниясының атқарушы директоры тікелей әуе қатынасын құру туралы бастаманы қолдады және тұрақты тікелей рейстерді ашу үшін қажетті рәсімдерді іске асыруға дайын екенін мәлімдеді.
