Halyk Finance инвестициялық банкінің сарапшылары Қазақстан азаматтарының осы жылдың екінші жартыжылдығындағы нақты жалақысы бойынша болжам жасады. Бұл туралы baigenews.kz жаңалықтар ресурсы хабарлады.
Инвестициялық банк сарапшылары 2020 жылдың бірінші жартыжылдығының қорытындысы бойынша экономикалық дағдарыс жағдайында қазақстандықтардың нақты жалақысы төмендеп жатқанын атап өтті. Оған Ұлттық экономика министрлігі жанындағы Статистика комитеті жариялаған ресми деректер дәлел бола алады.
Атап айтқанда, осы деректерге сәйкес, ағымдағы жылдың алты айында республикамыздағы нақты жалақы 2019 жылдың осы кезеңімен салыстырғанда 1,8 %-ға азайды.
«Біз нақты жалақының төмендеуі жылдың екінші жартысында жалғасады деп ойлаймыз, бұл жұмыссыздықтың айтарлықтай өсуімен бірге (өзін-өзі жұмыспен қамтығандар, уақытша жұмыс істемейтіндер) инфляция қысымын тежейді. Біз инфляция бойынша, ағымдағы жылдың соңында 7,3 пайыз деңгейінде болады деп болжаймыз», — деп есептейді Halyk Finance сарапшылары.
Сонымен қатар, Статкомитеттің ресми деректеріне сәйкес, 2020 жылдың бірінші жартыжылдығында Қазақстанда 7,6 мыңнан астам азамат қысқартылды. Өңір бойынша ең көп жұмысшыларын жұмыстан шығарған — Қарағанды облысы, атап айтқанда бұл облыста 1537 адам жұмысынан айырылған.
Сурет: rus.azattyq-ruhy.kz
