Мемлекеттік қызмет істері агенттігінің төрағасы Анар Жайылғанова бүгін орталық коммуникациялар қызметінде өткен баспасөз мәслихатында президенттік жастар кадрлық резервін құру көптеген мемлекеттік міндеттерді шешуге және жаңа жас басшылардың әлеуетін ашуға мүмкіндік беретінін мәлімдеді.
«Түрлі салаларда белгілі бір жетістіктері бар жас қазақстандықтардың президенттік жастар кадрлық резервіне іріктеуден өтіп, елдегі жоғары мемлекеттік және басқару лауазымдарына тағайындалуына мүмкіндік туды», — деді Анар Жайылғанова.
Ол мұндай резервті құру жастарды және жастар саясатын жылдам әрі тиімді ілгерілетуге көмектеседі деп мәлімдеді.
«Президенттік жастар кадрлық резервін құру мемлекеттік міндеттерді шешуде жаңа жас басқарушылардың әлеуетін пайдалануға мүмкіндік береді», — деді спикер.
Іріктеу ақпараттық жүйелердің көмегімен жүзеге асырылады. Бұл процестің ашықтығы мен транспаренттілігін білдіреді. Қазақстан азаматтарына іріктеуге қатысушылар туралы барлық қажетті ақпарат беріледі.
«Біздің азаматтарымыз іріктеуге кімнің қатысқанын көре алады. Сонымен қатар, іріктеудің әр кезеңінен кейін біз автоматтандырылған жүйе мен агенттіктің сайтында келесі кезеңге өткендердің тізімін жариялайтын боламыз», — деп түсіндірді Анар Жайылғанова.
Сондай-ақ, процестің ашықтығын қамтамасыз ету үшін қоғам өкілдері тартылатын болады.
Сурет: parlam.kz
