Бүгін мемлекет басшысы Қасым-Жомарт Тоқаев Қазақстанда карантин режимін тағы екі аптаға ұзарту туралы тапсырма берді, деп хабарлайды “ҚазАқпарат” ақпарат ресурсы.
Бұл жөнінде Қазақстан Республикасы Президенті жанындағы Қазақстан стратегиялық зерттеулер институтының басшысы Зарема Шаукенова өз ойын білдірді.
Оның пайымдауынша, Қасым-Жомарт Тоқаев шілде айында енгізілген қатаң карантин режимінің оң нәтижесін бекіту мақсатында осы тапсырманы берді, соның арқасында елімізде сырқаттану көрсеткіші 29%-ға төмендеді, төсек-орындармен қамтылу 43%-ға азайды және вирустан сауыққан азаматтардың саны 63%-ға дейін өсті.
Сонымен қатар, Шаукенова қазіргі уақытта еліміздің басшылығы коронавирустың таралуына қарсы күресте дұрыс шаралар қабылдап жатқанын атап өтті.
“Мемлекеттің дұрыс және ашық ақпарат саясаты, уақтылы және жан-жақты әлеуметтік, медициналық қолдау бізге, Қазақстан азаматтарына, жағдайдың жақсаратынына сенімділік береді”, – деді ол.
Бүгінгі таңда елімізде коронавирустың 86192 жағдайы ресми түрде тіркелді. Дегенмен, дәрігерлер 56638 адамды вирустан емдеді.
Сурет: rus.azattyq-ruhy.kz
