Шанхай Ынтымақтастық Ұйымының бас хатшысы Владимир Норов брифинг өткізді, оның барысында ШЫҰ-ның алдағы саммиті туралы айтты, деп хабарлайды «ҚазАқпарат» жаңалықтар ресурсы.
Владимир Норов коронавирус инфекциясының таралуына байланысты Ресей тарапының бастамасымен бұл саммиттің өтетін күні ауыстырылғанын еске салды. Енді оны биылғы жылдың күзінде Санкт-Петербургте өткізу жоспарланып отыр.
Бас хатшы саммитке дайындық қарқынды жүріп жатқанын атап өтті. Сонымен қатар, ол іс-шара аясында 20-дан астам құжатты бекіту жоспарланып отырғанын, ең бастысы Санкт-Петербург декларациясы екенін атап өтті.
Алдағы саммитте қабылданатын тағы бір маңызды құжат — ШЫҰ-ның 2025 жылға дейінгі даму стратегиясын іске асыруға бағытталған жоспар.
Сондай-ақ брифинг аясында Владимир Норов саммитке тек ШЫҰ мемлекет басшылары ғана емес, сонымен қатар Беларусь, Ауғанстан, Иран, Моңғолия, Вьетнам және Түркіменстан басшыларының қатысуы жоспарланғанын айтты.
Шанхай ынтымақтастық ұйымы 2001 жылы құрылды. Оған мүше елдер — Қазақстан, Ресей, Тәжікстан, Қырғызстан, Өзбекстан, Қытай, Пәкістан және Үндістан.
Сурет: inform.kz
