“Самұрық-Қазына” ұлттық әл-ауқат қоры Мақтаарал ауданындағы су тасқынынан зардап шеккен нысандарды қалпына келтіруге көмектеседі. Бұл мақсатқа ол бір миллиард теңге жұмсайды. Бұл туралы zakon.kz ақпарат агенттігі хабарлады.
Қор қаржылық қолдауды “Түркістан” әлеуметтік даму корпоративтік қорының шотына аударады, ол өз кезегінде бөлінген ақша қаражатын мақсатты пайдаланылуын қамтамасыз етеді.
Қазір “Самұрық-Қазына”, “Түркістан” қоры мен Түркістан облысы әкімдігі арасында тиісті келісім жасау мәселесі қарастырылып жатыр.
“Самұрық-Қазына” қорында Мақтаарал ауданының нысандарын қалпына келтіруге миллиард теңге бөлу туралы шешім мемлекет басшысы Қасым-Жомарт Тоқаевтың тапсырмасы бойынша қабылданғанын атап өтті.
1 мамыр күні Өзбекстан Республикасында Сардоба су қоймасының бөгеті бұзылып, Мақтаарал ауданының коллекторлары суға толды, нәтижесінде ауылдарды су басты.
Президент Қасым-Жомарт Тоқаев су тасқынынан зардап шеккен азаматтарға жаңа тұрғын үй салынып, жөндеу жұмыстары жүргізілетінін атап өтті. Олардың барлығы 100 мың теңге көлемінде материалдық көмек алады.
Сурет: zakon.kz
