Алматы әкімі Бақытжан Сағынтаев жұмыс сапарымен әлеуметтік, жол-көлік және инженерлік инфрақұрылымдарды салу бойынша бірқатар нысандарды аралады, деп «ҚазАқпарат»ХАА хабарлайды.
Мегаполис әкімі өзінің Instagram аккаунтында көшелерді тесу, мектептер, жолдар салу, сумен жабдықтау және су бұру жұмыстары туралы айтты. «Кезекті жұмыс сапары барысында инфрақұрылымдық жобалардың жүзеге асырылу барысымен танысты. Медеу ауданында Юбилейный және Көлсай сияқты шағын аудандардың тұрғындарын сумен толыққанды қамтамасыз ету үшін «Балқаш» су тарту құрылысын толық қайта жаңарту мүмкіндігі зерделенетін болады», — деп Б.Сағынтаев жазды. Наурызбай ауданында Алматы әкімі Таусамалы шағын ауданындағы Қонаев көшесін кеңейту, Нұрлы көшесі мен Абай даңғылын тесу, Қалқаман-2 шағын ауданында 1,5 мың орындық мектеп салу және Ақжар шағын ауданында өрт сөндіру депосын аралады. Тастыбұлақ шағын ауданындағы 15 көшеде сумен жабдықтау және су бұру желілері тартылды, жақын арада жол жабынын қалпына келтіру басталады.
Б.Сағынтаев зауыттарда дайындау сатысында асфальт-бетон қоспасының сапасын бақылауды тапсырды. Сонымен қатар, аудан әкімдігі алдында қала тұрғындарының демалуы үшін толыққанды саябақ салу туралы шешім қабылданды. Әкім Ақсай-4 шағын ауданындағы 825 орындық №132 гимназияға жапсарлас салынған жаңа корпус құрылысының барысымен, сондай-ақ Әуезов ауданының аумағын абаттандыру жобаларымен танысты. Алтын бесік шағын ауданында тұрғындардың өтініші бойынша балалар ойын және спорт алаңдары салынатын қоқыс учаскелері тазартылды. Сондай-ақ, қала басшысы өндірістік қуаттармен және №2 коммуналдық автопарктің жұмысын жаңғырту жоспарларымен танысты. «Қоғамдық көлік қозғалысы аралығын қысқарту үшін жолаушылар тасымалын ұйымдастырудың жаңа тәсілдерін зерделейміз», — деп Б. Сағынтаев атап өтті.
