Роспотребнадзор Тәуелсіз Мемлекеттер Достастығы елдерінің мамандарымен коронавирусқа қарсы тұру жөнінде кеңес өткізді. Бұл туралы ТМД Атқару комитетінің баспасөз қызметі хабарлады.
Бейнеконференция байланысы режимінде өткен кеңеске ТМД-ға қатысушы елдердің, оның ішінде Қазақстан Республикасының, Денсаулық сақтау органдары мен вирусологиялық зертханаларының 40-қа жуық өкілдері қатысты.
Бейнеконференция кезінде Роспотребнадзор мамандары Достастық елдерінің әріптестеріне індеттің таралу жағдайында Ресей Федерациясында эпидемиологиялық қадағалауды ұйымдастыру тәжірибесімен бөлісті.
Сонымен қатар, ТМД елдерінің мамандары Ресейдің коронавирустық инфекцияны зертханалық диагностикалауымен, сондай-ақ COVID-19 науқастарымен тығыз байланыста болған тұлғаларды қадағалаудың ресейлік тетігімен танысты.
Кеңес беру аясында Ресей тарапы елдегі эпидемиологиялық жағдайды мониторингілеу үшін Ресейде пайдаланылатын электрондық бағдарламалар туралы мәлімет берді.
Бейнеконференция соңында Роспотребнадзор коронавирусқа қарсы күресте бірыңғай тәсілдерді құру үшін Достастық елдерінің мамандарымен осындай кеңестер өткізуді жалғастыру қажет деген шешімге келді.
