Ватиканның мемлекеттік хатшысы кардинал Пьетро Паролин Рим Папасы Францисканың атынан Қазақстанның оңтүстік астанасы маңында жолаушылар ұшағының апатқа ұшырауына байланысты көңіл айту жеделхатын жолдады.
Жеделхатта Рим Папасы Алматы облысындағы жақында болған әуе апатына қайғырып, қазақстандық Bek Air компаниясы ұшағының құлауы салдарынан қаза болғандардың барлық туған-туыстарына көңіл айтады.
“Жақында Алматыда болған ұшақ апаты туралы естігеннен соң, Аса Қасиетті Папа Франциск осы қайғылы жағдайда зардап шеккендердің барлығына көңіл айтады. Ол қаза болғандардың рухтарының мәңгілік тыныштық табуын, зардап шеккендердің жазылып кетуі үшін дұға етеді. Аса Қасиетті Папа Құдіреті күшті Құдайдан барлық адамдар үшін, әсіресе құтқару, қалпына келтіру жұмыстарына қатысып жатқан адамдарға күш-қуат беруді және бейбітшілік сұрайды” – делінген келген жеделхатта.
Ағымдағы жылдың 27 желтоқсанында Алматы облысында жолаушылар лайнері құлап, салдарынан 12 адам қаза тапты. Алдын ала болжам бойынша, ұшу кезінде әуе кемесінің артқы бөлігі ұшу-қону жолағына бірнеше рет соқтыққаннан апатқа ұшырады.
Осыған байланысты мемлекет басшысы Қасым-Жомарт Тоқаев 28 желтоқсанда аза тұту күні деп жариялады, сондықтан Қазақстанда ойын-сауық сипатындағы барлық іс-шаралар тоқтатылды.
