Павлодар облысының туризм және спортты дамыту басқармасының қызметкерлері Қазақстан мен Ресейдің жетекші туристік агенттіктері үшін Баянауыл бойынша үш күндік баспасөз турын ұйымдастырды.
Облыстық туризм және спортты дамыту басқармасы басшысының орынбасары Феризат Сапариева баспасөз турының басты мақсаты туризм саласы мен БАҚ өкілдерін өңірдің туристік әлеуетімен таныстыру болып табылатынын хабарлады.
“Турагенттер барлығын өз көздерімен көріп, біздің өлкеміздің атақты жерлерінде болу керек. Бірінші күні қонақтар Потанин атындағы облыстық тарихи-өлкетану мұражайына, Бұқар жырау атындағы әдебиет және өнер мұражайына, Шафер мұражай-үйіне, “Гусиный перелет” ашық аспан астындағы мұражайға, Мәшһүр Жүсіп мешітіне барып, Павлодар қаласына шолу экскурсиясын жасады”, – деді Сапариева.
Оның айтуынша, Баянауылға жеті қаладан, атап айтқанда Алматы, Қарағанды, Новосібір, Нұр-Сұлтан, Семей, Павлодар және Екібастұз қалаларының туристік агенттері келді.
Сонымен қатар, Бұқар жырау атындағы облыстық әдебиет және өнер музейі басшысының орынбасары Мағзия Әбенова жыл сайын Баянауыл ауданының Ескелді шатқалында Мәшһүр Жүсіп Көпеевтің кесенесіне мыңдаған қажылар келетінін айтты.
“Осы күндері мұнда арнайы салынған ғимаратта мұражайдың жаңа экспозициясы ашылады, онда келушілердің назарына бірегей жәдігерлер, оның ішінде Мәшһүр Жүсіп пен оның туған-туыстары мен жақындары қолданған жеке заттары ұсынылады”, – деп толықтырды Мағзия Әбенова.
Баспасөз туры соңында қатысушылар Павлодардың Ертіс өңірінде туризмді дамыту саласындағы ынтымақтастық туралы меморандумға қол қойды.
