Қазақстан Республикасы индустрия және инфрақұрылымдық даму министрлігінің басшысы Роман Скляр Ресей Федерациясының өнеркәсіп және сауда министрі Денис Мантуровпен кездесу өткізді, деп хабарлайды Қазақстанның Ресейдегі елшілігінің баспасөз қызметі.
Кездесу барысында министрлер 2020 жылдан бастап №405 Алматы авиажөндеу зауытының базасында ресейлік «Ми» тобы тікұшақтары құрастырылатын болады деп келісті. Сонымен қатар, тараптар Ресей мен Қазақстан кәсіпорындары бірлескен жобаларды жүзеге асырады деген ортақ пікірге келді.
Сондай-ақ, әңгіме барысында Ресейде шығарылатын авиатехниканы құрастыру бойынша өндірістік тізбекке қазақстандық кәсіпорындардың өнімдерін интеграциялау мәселесіне ерекше назар аударылды.
Кездесу аясында қатысушылар өнеркәсіптік кооперацияны дамытуға және бірлескен жобаларды жүзеге асыруға қатысты мәселелерді қарастырды.
