Қарағанды фармацевтикалық кешені (ҚБК) Қазақстан Республикасының аумағында «Гам-КОВИД-Вак» («Спутник – V») коронавирустық инфекцияға қарсы вакцинаны тіркеу процесін аяқтады.
Кәсіпорынның баспасөз қызметі хабарлағандай, 2021 жылғы 13 ақпанда тіркеу деректері материалдарын қарау қорытындысы бойынша вакцинаның қауіпсіздігі, сапасы мен тиімділігі туралы ҚР Денсаулық сақтау министрлігінің сараптама ұйымының қорытындысы алынды. Қорытынды негізінде ҚР ДСМ Медициналық және фармацевтикалық бақылау комитетіне тіркеу куәлігін алуға өтінім жолданды.
Қазақстан «Спутник-V» вакцинасын қолдануды мақұлдаған 27-ші ел болды. Бүгінгі күні вакцина Ресей, Беларусь, Аргентина, Боливия, Сербия, Алжир, Палестина, Венесуэла, Парагвай, Түрікменстан, Венгрия, БАӘ, Иран, Гвинея Республикасы, Тунис, Армения, Мексика, Никарагуа, Серб Республикасы (Босния және Герцеговина энтитеті), Ливан, Мьянма, Пәкістан, Моңғолия және Бахрейн сияқты елдерде тіркелген.
Қазақстанда вакцина өндіру туралы шешім ҚР Денсаулық сақтау министрлігінің комиссиясы мен Ресейдің тікелей инвестициялар қоры қазақстандық фармацевтикалық кәсіпорындарды аралап, зерттегеннен кейін қабылданды.
«ҚБК алаңы ресейлік субстанциядан вакцинаның дайын түрін өндіруге барынша дайын болды. РФПИ мамандары жүргізген техникалық аудит өндірістік алаңның коронавирусқа қарсы вакцинаның дайын түрін шығаруға қойылатын барлық талаптарға сәйкестігін растады. Алдын ала есептеулер бойынша, ағымдағы жылдың ақпан айының соңында еліміздің барлық өңірлеріне ҚБК өндірген «Спутник — V» вакцинасының 90 мыңға жуық дозасын жеткізу жоспарланып отыр», — деп ҚБК баспасөз қызметі атап өтті.
12 ақпанда «Спутник V» әзірлеушісі өзінің Twitter-де Қазақстанның вакцинаны тіркегені туралы хабарлады. Алайда, ҚР Денсаулық сақтау министрлігі бұл ақпаратты растамады, тіркеу процесі әлі жүріп жатқанын хабарлады. Ведомствода әңгіме Қарағанды фармацевтикалық кешені өндірген «Спутник V» туралы болып отырғанын түсіндірді.
Сурет: zakon.kz
