Біздің мемлекетіміздің қорғаныс ведомствосы қазақстандық әріптестерімен тәжірибе алмасып, коронавируспен күресуге көмекке келген ресейлік әскери дәрігерлердің жұмысы туралы айтты.
Қорғаныс министрлігінің мәліметінше, бауырлас екі елдің әскери дәрігерлері Нұр-Сұлтан және Алматы әскери госпитальдарында бірлесе жұмыс істеп жатыр. Сонымен қатар, коронавируспен ауыратын науқастарды емдеудің қазақстандық хаттамасын зерделеумен қатар, Ресейден келген мамандар емдеу процесіне белсенді қатысуда.
Қазақстанға келгеннен бері ресейлік мамандар COVID-19 науқастарын емдеудің қазақстандық клиникалық хаттамасы Ресейдегідей екенін байқады. Сондай-ақ, дәрігерлер әскери госпитальдардың жабдықталуын және әріптестерінің дайындық деңгейін жоғары бағалады.
«Әріптестерімізбен қарым-қатынаста болған бір апта ішінде біз Қазақстан Республикасының Әскери-медициналық қызметінің өте жақсы дайындығына көз жеткіздік. Жаңа коронавирус инфекциясын емдеуде олар озық халықаралық тәжірибені қолданады», — деді ресейлік әскери дәрігер Вадим Пивоваров.
Қорғаныс ведомствосы қазіргі уақытта Алматы әскери госпиталінде COVID-19-бен ауырған пациенттер санының азайып, науқастардың сауығуы бойынша оң динамика байқалатынын атап өтті.
Індет басталғаннан бүгінгі күнге дейін Қазақстан Республикасында коронавирусты жұқтырудың 103300 жағдайы тіркелді. Дәрігерлер 84445 адамды осы вирустан емдеді.
Сурет: gov.kz
