Ленинград облысында “Невский пятачок” плацдармында Отанымызды фашистік неміс басқыншыларынан қорғаған Ұлы Отан соғысы жауынгерлерін қайта жерлеу рәсімі өтті, деп хабарлайды “ҚазАқпарат” жаңалықтар ресурсы.
Салтанатты шараға Қазақстан тарапынан Санкт-Петербургтегі мемлекетіміздің бас консулы Бауыржан Досманбетов қатысты.
Сондай-ақ, іс-шараға Ұлы Отан соғысының ардагерлері, тыл еңбеккерлері, Ленинград облысы Киров ауданының мемлекеттік органдарының өкілдері, іздеу жасақтарының жауынгерлері және жергілікті тұрғындар шақырылды.
Батырлар барлық әскери құрметпен жерленді. Барлығы 421 сарбаз. Олардың арасында Қазақстан тумасы Филипп Иванович Ельцов болды.
Іздеу жасағының мүшелері оның 1942 жылы Солтүстік Қазақстан облысынан майданға шақырылғанын анықтады. Қазақстандық сарбаз ерлігі үшін “Ленинградты қорғағаны үшін” медалімен марапатталған. 1943 жылы жауынгер хабар-ошарсыз кеткен.
Бұған дейін біздің Республикамыздың Мәскеудегі дипломатиялық өкілдігі және “Искра Победы” жобасының ұйымдастырушылары қолдауымен Ұлы Отан соғысына қатысқан қазақстандық батырлардың есімдері жинақталған интернет-сайт іске қосылғаны хабарланған.
