Қазақстанның қару-жарағын тексеруді Қырғызстан, Тәжікстан және Ресей Федерациясының әскери қызметшілері жүргізді. Бұл туралы ҚР Қорғаныс министрлігінің баспасөз қызметі хабарлады.
“Қазақстан Республикасы, Қырғыз Республикасы, Ресей Федерациясы, Тәжікстан Республикасы және Қытай Халық Республикасы арасындағы шекара ауданында қарулы күштерді өзара қысқарту туралы келісімді жүзеге асыру аясында Қазақстан Республикасының аумағында инспекциялық іс-шаралар өткізілді. Қазақстан Республикасы Қорғаныс министрлігінің басшылығы Қазақстан Республикасының шекаралық қызметімен бірлесіп Қазақстан Республикасы, Қырғыз Республикасы, Ресей Федерациясы және Тәжікстан Республикасының өкілдерінен тұратын инспекциялық топ құрды “,-деп хабарлады ҚР Қорғаныс министрлігінің баспасөз қызметі.
Баспасөз қызметі қызметкерлері инспекциялық топқа қару-жарақты бақылау және инспекцияны қамтамасыз ету жөніндегі арнайы орталықтың қызметкерлері еріп жүретінін хабарлады.
“Инспекцияның мақсаты – Қазақстан-Қытай шекарасының екі жағында да 100 шақырым аймақта орналасқан қару-жарақ, әскери техника мен жеке құрамның саны туралы жыл сайынғы әскери ақпаратты тексеру”, – деді баспасөз қызметінің қызметкерлері.
