Ресейдің сыртқы саяси ведомствосының басшысы Сергей Лавров осы жылдың 9 қыркүйегінде өтетін Шанхай Ынтымақтастық Ұйымының Сыртқы істер министрлері кеңесі аясында қазақстандық әріптесі Мұхтар Тілеубердимен кездесу өткізбекші. Бұл туралы Ресей СІМ-нің ресми өкілі Мария Захарова хабарлады.
“Тоғызыншы қыркүйекте Мәскеуде келіссөздер өтеді, ШЫҰ СІМК аясында Ресей Сыртқы істер министрі Сергей Лавровтың Қазақстан Республикасының Сыртқы істер министрімен кездесуі өтеді”, – деді Захарова брифинг барысында.
Сондай-ақ, ол кездесу аясында екі ел арасындағы стратегиялық серіктестік пен одақтастықтың маңызды мәселелері қаралатынын атап өтті.
Захарованың айтуынша, сол күні Сергей Лавров Қырғыз Республикасындағы әріптестерімен келіссөздер жүргізеді.
“Елдеріміздің сыртқы саяси ведомстволары басшыларының кездесуі жоғары деңгейде қол жеткізілген уағдаластықтарды іске асыруға ықпал ететін болады”, – деп атап өтті РФ Сыртқы істер министрлігінің ресми өкілі.
Келіссөздер барысында қатысушылар өңірлік күн тәртібі мен екіжақты өзара іс-қимылдың бірінші кезектегі мәселелерін, сондай-ақ жоғары деңгейдегі болашақ кездесулерді өткізу кестесін талқылайды.
Сурет: ru.sputniknews.kz
