Ресей премьер-министрі Михаил Мишустин Тәуелсіз Мемлекеттер Достастығы Үкіметаралық кеңесінің бүгінгі видеоконференциясы барысында коронавирусқа қарсы күресте ТМД елдерінің бірлескен күш-жігері туралы айтты, деп хабарлайды ria.ru жаңалықтар ресурсы.
Отырысқа қатысушылардың алдында сөз сөйлеген Михаил Мишустин Достастық мемлекеттерінде ортақ шекаралар ғана емес, бірыңғай эпидемиологиялық кеңістік бар екенін атап өтті.
Сонымен қатар, Ресей Үкіметінің басшысы ТМД елдерін коронавируспен күресте КСРО-ның үздік тәжірибелерін пайдалануға шақырды.
Сондай-ақ, Михаил Мишустин Достастыққа мүше елдер арасындағы тығыз өзара іс-әрекетті және індеттің таралуына қарсы күресте қабылданған ұжымдық шараларды атап өтті.
«Басты міндет — ауруды ерте кезеңінде анықтау. Бұл үшін біздің елдеріміздің санитарлық қызметтері инфекциямен күрес әдістемелерімен алмасып, тест-жүйелермен, шығын материалдарымен қажетті көмек көрсетуде», — деді ресейлік премьер.
Бейнеконференция соңында ТМД елдерінің үкімет басшылары кеңесінің келесі отырысы биылғы жылдың 6 қарашасында Өзбекстан Республикасында өтеді деп шешілді.
Сурет: 3dnews.ru
