Еуразиялық даму банкінің қолдауымен өткізілетін бірінші Еуразиялық конгрессте Ресей үкіметінің басшысы Михаил Мишустин Еуразиялық экономикалық одақтың одан әрі дамуына қатысты пікір білдірді.
Мишустин одақ жұмыс істеп жатқан бес жыл ішінде елдер арасындағы ынтымақтастықтың негізгі бағыттарын реттеуді үйлестіруге қол жеткізілгенін айтты. Сонымен қатар, ол ЕАЭО өзінің дамуының жаңа деңгейіне шығуы тиіс екенін атап өтті.
“Тауарлар, қызметтер, капитал, жұмыс күші барған сайын еркін қозғалыста болатын бірыңғай нарықты нығайту бағытын жалғастыру, сонымен бірге бес елдің бірыңғай цифрлық кеңістігін құру қажет”, – деді Мишустин.
Оның пікірінше, одақтас елдерге сандық технологияларды экономиканың барлық салаларына енгізу қажет, өйткені олар біртұтас экономикалық кеңістікті қалыптастырудың басты факторы болып табылады.
Мишустин ЕАЭО кеңістігінде цифрлық көлік дәліздерін дамыту қажет екенін баса атап өтті, оның айтуынша, ол Одақ ішіндегі тауарлардың қозғалысын жеделдетумен бірге, көлік-логистикалық компаниялардың табысын да арттырады.
ЕАЭО 2015 жылы құрылды. Сол кезден бастап бүгінгі күнге дейін Қазақстан Республикасы оның белсенді қатысушысы болып табылады. Біздің мемлекеттен басқа, одақ құрамына Ресей Федерациясы, Қырғызстан, Армения және Беларусь кіреді.
Сурет: akhabar.kg
