Келдыш атындағы орталықтың бас директоры Владимир Кошлаков Қазақстанда «Каспий» тұщыландыру зауыты жаңғыртылатынын мәлімдеді. Бұл туралы ТАСС хабарлайды.
Бұл мәлімдемені Ресей зерттеу орталығының басшысы Мәскеу түбіндегі «Патриот» конгресс-көрме орталығының аумағында өтіп жатқан «Армия-2020» халықаралық әскери-техникалық форумында жасады.
Владимир Кошлаковтың айтуынша, қазіргі уақытта Ақтаудағы тұщыту кәсіпорнының қуаты сағатына 20 мың текше метр суды құрайды, ал жаңғыртылғаннан кейін өнімділік көрсеткіші екі есе — 40 мыңға дейін өседі.
Сонымен қатар, бас директор Келдыш атындағы орталық салған «Каспий» кәсіпорны Тәуелсіз Мемлекеттер Достастығы кеңістігіндегі ең ірі зауыт болып табылатынын айтты.
Сондай-ақ, «Армия-2020» форумы аясында Кошлаков өзі басқаратын орталықта әзірленген технологияларға сәйкес Калининградта «Автотор» кәсіпорыны, Мәскеу мұнай өңдеу зауыты салынғаны туралы мәлімет берді.
Владимир Кошлаков «Роскосмос» мемлекеттік корпорациясының құрамына кіретін Келдыш атындағы орталықтың барлық мамандары суды тазарту және тұзсыздандыру бойынша отыздан астам жобаны іске асырғанын атап өтті.
Сурет: inform.kz
