Ресей Федерациясы Кеңесінің Төрағасы Валентина Матвиенко жеделхатта Нұрлан Нығматулинді Қазақстан Республикасы Парламентінің Спикері лауазымына қайта сайлануымен құттықтады. Ол екі ел депутаттарының кейінгі ынтымақтастығына үміт білдірді.
“Ресей Федерациясы Федералдық Жиналысы Федерация Кеңесінің атынан және жеке өз атымнан сіздерді Қазақстан Республикасы Парламенті Мәжілісінің Төрағасы қызметіне қайта сайлануыңызбен шын жүректен құттықтаймын”, — делінген жеделхатта.
Сондай-ақ, Матвиенко еліміздің парламентіне сайлау нәтижелері қазақстандықтардың Nur Otan саяси партиясына және оның әлеуметтік-экономикалық тұрақтылықты қамтамасыз етуге бағытталған қызметіне оң баға беретінін атап өтті.
Сонымен қатар, ол бай тәжірибе мен бедел Нығматулинге мемлекет дамуының міндеттерін одан әрі шешуге, сондай-ақ Қазақстанның әлемдік аренадағы ұстанымын нығайтуға мүмкіндік беретініне сенім білдірді.
“Екі ел парламенттері палаталарының желісі бойынша мемлекет басшыларының уағдаластықтарын іске асыруға жәрдемдесуге, ынтымақтастықтың шарттық-құқықтық базасын оңтайландыруға және біздің елдеріміздің азаматтарының игілігі үшін стратегиялық әріптестік пен одақтастық қағидаттарына негізделген ресей-қазақстан қатынастарының бай әлеуетін ашуға бағытталған жұмыс жалғасады деп сенемін”, — делінген құттықтауда.
Қорытындылай келе, Валентина Матвиенко Ресей мен Қазақстан парламентшілерінің арасындағы сенімді жоғары бағалады, сондай-ақ Мәжіліс спикеріне Мемлекеттік жұмыста табыс тіледі.
Сурет: tass.ru
