Ресейлік “Технониколь” корпорациясы Алматы маңында жылу оқшаулағыш материалдар шығаратын екі зауыт салуды жоспарлап отыр. Бұл туралы Алматы облысының әкімдігі хабарлады.
Оның өкілдері ынтымақтастық туралы үшжақты меморандумға қол қойды. Әкімдікте екі зауыт та Талғар ауданында салынатынын, корпорация жобаға 44 миллиард теңгеден астам қаржы салатынын айтты.
Зауыттардың бірінде энергия үнемдейтін жылу оқшаулағыш материалдары, қабырғаларға, шатырларға, қасбеттерге, едендерге және ішкі қалқаларға арналған құрылыстық жылу- және дыбыс оқшаулағыш, сэндвич-панельдерге арналған материалдар, техникалық оқшаулағыш, оттан қорғау және ауыл шаруашылығына арналған субстраттар шығарылатын болады.
Екінші кәсіпорында шатырды, іргетасты, еденді жылыту, әртүрлі инфрақұрылымдық жобаларды іске асыру үшін қолданылатын экструзиялық полистирол шығарылады.
Өз кезегінде Алматы облысының басшысы Амандық Баталов кәсіпорындарды іске қосу өңір экономикасына мультипликативті ықпал ететінін атап өтті.
“Алматы облысында тұрғын үй құрылысының көлемі жыл сайын артып келеді. Сондықтан бізге озық технологияларды қолдана отырып, заманауи өндіріс қажет”, – деді әкім.
“Технониколь” компаниясының зауыттары автоматтандырудың жоғары дәрежесімен ерекшеленетінін атап өткен жөн және олар барлық экологиялық нормалар мен талаптарды сақтауға ерекше назар аударады. Сонымен қатар, осы компания өндіретін өнімдер құрылыс технологиясын едәуір жеңілдетуге мүмкіндік береді. Тағы бір ерекшелігі — оқу орталықтарын ашу, онда кәсіпорындардың қызметкерлері де, мердігерлік ұйымдардың өкілдері де зауытта жұмыс істеуге және құрылыста заманауи материалдарды пайдалануды меңгеру үшін оқи алады. Алматы облысындағы жаңа зауыттар да бұған қосылады, оларды іске қосу арқасында өңір экономикасына 250-ге жуық жұмыс орнын құрып, елеулі инвестициялар тартылатын болады.
