Қазақстан үкіметінің басшысы Асқар Мамин Чолпон-Атадағы Еуразиялық үкіметаралық кеңестің отырысына қатысты. Бұл туралы Қазақстан үкіметінің баспасөз қызметі жазады.
Отырысқа Ресей премьер-министрлері – Дмитрий Медведев, Беларусь – Сергей Румас, Армения – Николай Пашинян, Қырғызстан – Мухамметкалый Әбілғазиев, сондай – ақ Еуразиялық экономикалық комиссия алқасының төрағасы-Тигран Саркисян қатысты.
Отырыс басталар алдында Еуразиялық экономикалық одаққа қатысушы елдердің үкімет басшылары Қырғызстан президенті Сооронбай Жээнбековпен кездесті.
Қатысушылары отырыс барысында интеграциялық үдерістерді одан әрі дамыту бойынша күн тәртібіндегі 15 мәселені қарады, сондай-ақ қаржы нарығын реттеу мәселелері бойынша пікір алмасты.
Сондай-ақ, тараптар өнеркәсіптік, агроөнеркәсіп және кеден салаларындағы өзара ынтымақтастық мәселелерін талқылады.
«Қазіргі уақытта ынтымақтастықтың өзекті мәселелері бойынша ЕАЭО туралы шарттың ережелерін жүзеге асыру, 2025 жылға дейінгі Еуразиялық экономикалық интеграцияны дамытудың стратегиялық бағыттары жобасын әзірлеу бойынша жұмыс жалғасуда», – деді Асқар Мамин.
ҚР Үкіметі басшысының айтуынша, «қарапайым заттар экономикасын» дамытудың бірлескен бағдарламасы кәсіпкерлікті жақсарту, халықты жұмыспен қамту және экономиканың өсуін қамтамасыз ету үшін басты құралдардың бірі болуы мүмкін.
Сондай-ақ Асқар Мамин экономиканың өсуіне ықпал ететін және үшінші елдердің нарығына тауарлар экспортын ынталандыратын электрондық сауда платформаларын дамытуды ұсынды.
Қазақстан Премьер-министрі нарықтық қаржы саласындағы ынтымақтастықты дамыту қажет деп есептейді. Осыған байланысты «Астана» халықаралық қаржы орталығының мүмкіндіктерін пайдалану ұсынылды.
Отырыс қорытындысы бойынша қатысушылар 12 құжатқа қол қойды. Атап айтқанда, ЕЭК пен АХҚО арасындағы ынтымақтастық туралы меморандум шеңберінде Еуразиялық экономикалық комиссия мен АХҚО арасында 2019-2021 жылдарға арналған бірлескен іс-шаралар жоспарына қол қойылды.
