Қазақстанның құқық қорғау ведомствосының басшысы Ерлан Тұрғымбаевтың төрағалығымен елордада жол қозғалысы қауіпсіздігін қамтамасыз етуге қатысты мәселелер талқыланған кеңес өтті.
Кеңесте осы жылдың 10 айында Нұр-Сұлтанда 469 жол-көлік оқиғасы тіркелгені, осы апаттардың нәтижесінде 29 адам қаза тауып, 590 адам дене жарақатын алғаны айтылды.
Осыған байланысты Ішкі істер министрлігінің өкілдері жол қозғалысын ұйымдастыру және оның қауіпсіздігін қамтамасыз ету бойынша шет мемлекеттердің тәжірибесін қарастырды.
Кеңеске қатысушылар алдында сөйлеген сөзінде Ішкі істер министрі Ерлан Тұрғымбаев еліміздің елордасы белсенді дамып келе жатқанын, бұл автомобильдің көбеюіне әкелетінін айтты. Сондықтан, ведомство басшысының айтуынша, жол қозғалысы қауіпсіздігін қамтамасыз етудің жаңа әдістерін әзірлеу қажет.
“Елордада жол қозғалысы қауіпсіздігі мәселелерін, соның ішінде жоғары технологияларды қолдана отырып кешенді шешетін жол қозғалысын ұйымдастырудың бірыңғай орталығын құру қажеттілігі туындап отыр”, – деді Тұрғымбаев.
Сурет: elorda.info
