Қазақстан Республикасының президенті Қасым-Жомарт Тоқаев ресми сапармен Ресей Федерациясына барды. Бүгін Мәскеу уақыты бойынша 15 сағат 30 минутта президент Владимир Путинмен кездесуі басталды, деп хабарлайды NUR.KZ.
Президенттер Кремльдің Жасыл қонақ бөлмесінде санаулы құрамда кездесу өткізеді.
Путин өзінің алғы сөзін Тоқаевтың Президент лауазымына кірісуімен құттықтаудан бастады. Сондай-ақ, ол Нұрсұлтан Назарбаевтың Ресей-Қазақстан қарым-қатынасын орнатудағы үлкен рөлі туралы мәлімдеді. “Әрине, бұл ең алдымен Қазақстанның Тұңғыш Президентінің еңбегі, бірақ барлық команда осы мақсатта жұмыс істеді”, – деді ол.
Тоқаев Путинге алғыс айтып, Назарбаевтың сәлемін және тілегін жеткізді. Ол қарым-қатынас орнатудағы Назарбаевтың үлкен рөлі туралы сөздерімен келісіп, олардың үнемі жоғары дамитынын атап өтті. Ол Назарбаев Ресей мен Қазақстан арасындағы қарым-қатынастарды эталондық деп атайтынын еске салып, оның мақсаты осы стратегияның сабақтастығын сақтау және халықтар достығын нығайту болып табылатынын, бұл екі мемлекет пен халықтардың ұлттық мүдделеріне сәйкес келетінін атап өтті.
Сурет: nur.kz
